- Nú renna Eyðgunn Samuelsen og Javnaðarflokkurin undan sínum egnu uppskotum um lønarsteðg í tvey ár, sigur Jákup Mikkelsen, formaður Fólkafloksins á tingi.
Jákup Mikkelsen vísir á, at tá Eyðgunn Samuelsen leggur formann Fólkafloksins, Jørgen Niclasen, og Fólkaflokkin undir at skjóta upp lønarsteðg við lóg, er beinleiðis ósatt og rein manipulatión.
- Tað Fólkaflokkurin millum annað hevur mælt til er ein avmarkaðan setanarsteðg. Hetta merkir, at um 300 fólk fara úr almennum starvi eitt ár, so seta vit 200 aftur í starv og soleiðis minka vit almenna sektorin við 100 fólkum um árið. Harafturat hava vit tikið undir við Javnaðarflokkinum, um at lønarkarmurin verður hin sami, við tí broyting, at Fólkaflokkurin mælir til sama lønarkarm hjá teimum alment løntu í fimm ár mótvegis Javnaðarflokkinum sum mælir til 2 ár.
Jákup Mikkelsen sigur, at Javnaðarflokkurin ikki hevur fingið nakað uppskot frá Fólkflokkinum at fremja lønarsteðg við lóg.
- Allir føroyingar eru greiðir yvir, at búskaparstøðan er álvarsom, og at neyðugt verður at taka tungar avgerðir, men hetta er neyðugt, og vit sum hava ábyrgd mugu vísa ábyrgd, sigur hann.
Jákup Mikkelsen sigur, at tilmæli Fólkafloksins miðjar ímóti at fáa tamarhald á búskapin, minka rakstrarútreiðslurnar og fáa hallið á fíggjarlógini burtur í 2015.
