Føroyskar rávørur til føroyskar gómar.
Hetta kann sigast um stóra og forvitnisliga tiltakið, sum verður á torginum frammanfyri Mentanarhúsið í Fuglafirði leygardagin, 2. september frá klokkan 11-17.
Tiltakið er partur av rúgvusmiklu skránni fyri mentanardagar, sum verða í Fuglafirði frá 31. august til og við 3. september.
- Hetta verður samstundis Føroya einasti matmarknaður, sum í so stóran mun fagnar heimliga tilfeinginum. Vit savna alt føroyskt tilfeingi innan matmentan og geva fólki møguleikan at skilja, smakka, snakka og keypa.
Fyrireikararnir vísa á, at matmarknaðurin, sum verður í Fuglafirði, er bæði ætlaður stórvinnu, smávinnu, einstaklingum og smærri sum størri átøkum. Her verður ein marknaður við alskyns vørum og brellbitum.
Á matmarknaðinum verður rabarbusaft úr Kalsoynni, røtur, urtir og annað gott úr Veltuni í Sandoynni, viðskeri av Trøllanesi, makrelur við mosarella, marineraður laksur á spjóti, toskur og tari.
- Ja, her verður alt frá hummarum til havhest, siga tey, sum skipa fyri forkunnuga matmarknaðinum á mentanardegnum í Fuglafirði næsta leygardag.
