Eirikur Lindenskov
Í blaðnum í gjár skrivaðu vit, at kommununevndin, sum landsstýrið sett í 1996, mælir til, at vit í Føroyum í framtíðini fara at hava 7 - 10 kommunur.
Álitið er ikki almannakunngjørt enn - tað verður latið løgmanni, Anfinni Kallsberg, sum eisini er landsstýrismaður í kommunumálum, 1. september, og tá verður tað alment.
Sosialurin skilir, at kommununevndin hevur havt sum útgangspunkt, at hvør sýsla skal vera ein kommuna. Men tá hetta kortini varð mett at vera ov órealistiskt, varð í staðin skotið upp at skipa landið í níggju kommunur.
Nevndin mælir til at Suðuroyggin verður býtt í tvær kommunur, sunnara og norðara.
Sandoyggin verður ein kommuna.
Streymoyggin verður ein kommuna, undantikið kommunurnar í Sundalagnum - Hósvík og norðureftir.
Kommunurnar í Sundalagnum verða ein kommuna.
Skálafjørðurin verður ein kommuna.
Fuglafjørður, Gøta og Leirvík verður ein kommuna.
Norðoyggjar verður ein kommuna Og Vágarnar verður ein kommuna.
