Í døgunum 2. og 3. des. 1998 vóru í Tórshavn samráðingar um fiskiveiðuavtalu millum Føroyar og Noreg fyri 1999. Partarnir undirskrivaðu avtalu í Tinganesi 3. des.
Fyri Føroyar hava serliga toskafiskiskapurin í Barentshavinum og makrelfiskiskapurin stóran týdning. Umframt at hava Føroyar í samráðingunum lagt stóran dent á rættindini við Svalbard. Hóast munandi veiðumøguleikar eftir ídnaðarfiski í Norðsjónum hava føroysk skip seinastu árini ikki fullnýtt tær loyvdu kvoturnar.
Fyri Noreg hevur fiskiskapur á djúpum vatni eftir serliga brosmu og longu umframt svartkjaftafiskiskapur stóran týdning í samvinnuni við Føroyar.
Grundað á fiskifrøðilig viðurskifti hava Noreg og Russland gjørt av at minka munandi um toskafiskiskapin í Barentshavinum í 1999. Kvotan, sum tey hava avtalað at lata til onnur lond, er sett niður í 59.000 tons úr 80.000 tonsum. Eisini hýsukvotan í Barentshavinum minkar nógv í 1999.
Hesar umstøðurnar ávirkaðu samráðingarnar millum Føroyar og Noreg nógv. Noreg var bundið av teimum avmarkingum, sum tað hevur avtalað saman við Russlandi, og kravdi tí munandi niðurskurð í føroysku toska- og hýsuveiðuni í Barentshavinum í 1999.
Føroyar vístu á, at føroysk skip í søguligum høpi hava tradisjón fyri at fiska í Barentshavinum og mettu ikki, at minkingin átti at vera so ógvuslig. Umframt setti føroyska sendinevndin ynski fram um møguleikar fyri at flyta kvoturættindi úr russiskum sjógvi í norskan sjógv.
Partarnir komu ásamt um minni lækking enn hana, sum norska sendinevndin kravdi og sum er minni enn tann lutfalsliga minkingin í triðjalandskvotuni.
Noreg og ES eru komin ásamt um at økja munandi um upsakvotuna í Norðsjónum í 1999. Føroysk skip kundu í 1998 fiska 1.600 tons av upsa í Norðsjónum. Føroyska sendinevndin setti ynski fram um hækking og var hetta lutfalsliga gingið á møti. Eisini ynski føroyinga um størri sildakvotu í norska partinum av Norðsjónum varð gingið lutfalsliga á møti.
Tann norska botnfiskakvotan við Føroyar minkar í 1999 niður í 5.000 tons. Svartkjaftakvotan hjá norðmonnum í føroyskum sjógvi í 1999 hækkar við 3.000 tonsum. Samstundis hækkar føroyska svartkjaftakvotan í norskum sjógvi í sama mun.
Spurningurin um føroyska rækjuveiðu við Svalbard varð umrøddur. Føroyar mótmæltu norsku avgerðini um regulering av hesum fiskiskapi sambært norskari kunngerð, sum ásetir avmarkingar fyri føroyskum rækjufiskiskapi við Svalbard. Føroyar vístu til mótmælini frá føroyskum myndugleikum og frá donskum myndugleikum vegna Føroyar og Grønland.
Makrelfiskiskapurin og umsitingin av makrelinum hevur verið nógv frammi seinastu tvey árini ? bæði í NEAFC og millum einstøk lond. Partarnir vístu á týdningin av at fáa makrelveiðuna í altjóða sjógvi reguleraða í samstarvið millum teir týðandi partarnar. Eisini varð víst til, at fundur verður millum strandalondini í Tórshavn fyrst í 1999, har makrelspurningurin verður viðgjørdur millum tey trý strandalondini Føroyar, Noreg og ES.
Føroysk veiða
í norskum sjógvi19981999
Norðan fyri 62 N
Toskur2.6002.000
Hýsa550350
Onnur sløg250200
Yvirflyting
Toskur1.5004.000
Hýsa250600
Onnur sløg100250
Makrelur3.9503.950
Svartkjaftur1.0004.000
Sunnan fyri 62 N
Ídnaðarfiskur29.00029.000
Upsi1.6001.800
Sild9001.200
Hemari/Hávur300300
Rossamakrelur5.0006.000
Við Jan Mayen
Svartkjaftur1.0001.000
Rækjur500200
Við Svalbard
Toskur1.355994
Onnur sløg325234
RækjurSambært dagaskipanSambært dagaskipan
Norsk veiða í føroyskum sjógvi
Botnfiskur5.1005.000
Hemari/Hávur300300
Makrelur9.6009.600
Rossamakrelur02.500
Svartkjaftur36.00039.000
Brugdulivur100100
Tinganesi 3. desember 1999
