Fleiri enn 70 sløg av náttúruheilivági eru góðkend

Vilmund Jacobsen

Náttúrulæknaheilivágur er eisini góð­kendur heilivágur, og skrásett eru fleiri enn 70 sløg, sum eru góð­kend til nýtslu fyri ymiskar sjúk­ur og pínu.
Áður varð ikki skilt millum hugtøkini náttúrulæknaheilivág, náttúru­heilivág og urtaheilivág. Orsøkin er, at krøv ikki vórðu sett til virknað ella trygd. Í dag er munur á, um heilivágurin er góðkendur sum náttúrulæknaheilivágur - ella, um eingi prógv eru fyri, at sløgini hava virknað, eitt nú sum kostískoyti.

Náttúrulæknaheilivágur
Men, hvat er so náttúru­lækna­heilivágur?
Jú, hetta er heilivágur, sum er góðkendur av danska Heilsu­stýri­num til viðgerð av lættari sjúk­um og pínu. Heilivágurin kann eitt nú brúk­ast í teimum føri, har ikki er brúk fyri lækna.
Náttúrulæknaheilivágur er eitt serligt slag av heilivági, sum van­liga er virkaður úr eitt nú turkaðum plant­um, plantulutum og úrdráttum úr plant­um ella øðrum náttúrligum evnum.
Náttúrulæknaheilivágur fæst í hondleypi á apotekum, heilsu­handl­um, materialistum og stór­handl­um.

Framleiðsla av náttúruheilivági
Hvussu verður so nátt­úru­lækna­heili­vágur framleiddur?
Heilivágurin er vanliga virkaður úr úrdráttum úr plantum ella úr pulvuriseraðum plantulutum. Heili­vágurin kann eisini hava sín upp­runa sum olja úr fiski ella dýrum.
Tað sermerkta við náttúru­lækna­heilivági er, at evnini oftast verða brúkt í somu konsentratión, sum tey eru í náttúruni.
Hesin heilivágur hevur altíð eitt loyvis­nummar í marknaðarføringini (MT-nummar) á pakkanum. Á henda hátt kunnu fólk skilja millum náttúru­læknaheilivág og eitt nú kost­ískoyti. Kelda: Sundhed.dk