Royndin hjá Taks at fáa føroyskar Airbnb útleigarar at uppgeva leiguinntøkurnar hevur eftir øllum at døma givið úrslit, tí tvífalt so nógvir útleigarar hava í 2018 givið leiguinntøkurnar upp til skattingar samanborið við í 2017.
Tað boðar Taks frá í dag.
Í krónum og oyrum merkir hetta, at uppgivnu inntøkurnar frá Airbnb útleigan eru øktar úr 10 milliónum upp í 19 milliónir krónur.
Sambært tølunum hjá Taks vóru 340 fólk, ið leigaðu út bústað í 2017, men einans 28% av teimum upplýstu um leiguinntøkuna. Taks fór í vár undir at senda sjálvsuppgávur til teirra, sum stovnurin veit hava útleigað umvegis Airbnb í 2018, og hetta hevur havt við sær eina munandi øking í uppgivnum leiguinntøkum. Av teimum 430 útleigarunum, sum nú eru, hava 53% givið leiguinntøku sína upp.
- Eg haldi, at Airbnb-átakið, sum vit gjørdu í vár, hevur riggað væl. Í tølunum síggja vit, at nógv gera rættari nú, og vit síggja týdningin av, at TAKS stuðlar fólki í at halda skyldur sínar og vegleiðir tey, hvussu tey skulu gera, sigur Eyðun Mørkøre, stjóri á TAKS.
Taks væntar eisini, at framrokningarnar hjá stovninum fara at halda. Taks metti fyrr í ár, at leiguinntøkurnar frá Airbnb fóru at liggja um 21 milliónir krónur. Hóast inntøkurnar í løtuni liggja á 19 milliónum, so væntar Taks, at tá øll eftirlit er liðug seinni í ár, fara leiguinntøkurnar upp á 21 milliónir.
Samstundis boðar Taks frá, at teir Airbnb útleigarar, ið framvegis ikki hava latið inn sjálvsuppgávuna, fáa nú bræv frá Taks við mettari leiguinntøku og tilhoyrandi skattarokning.
