Flogferðslan er við at fáa flog aftur aftur, men tað er langur vegur upp í hæddirnar, sum vóru áðrenn koronu.
2019 var eitt serliga gott ár, tá ið tað kom til ferðafólkatal á flogvøllinum í Vágum. Samanlagt ferðaðust 424.281 ferðafólk umvegis flogvøllin í 2019.
So kom korona, og ferðafólkatalið rapaði niður. Í fjør ferðaðust úti við 180.000 ferðafólk um flogvøllin.
Seinasta uppgerðin hjá Vága Floghavn vísir, at juni mánaði í ár var nógv betur enn juni í fjør. 17.906 ferðafólk fóru um flogvøllin í Vágum í juni, og tað vóru 80 prosent fleiri enn juni í 2020, sum var hart raktur av koronu.
Flogferðslan er tó langt frá tí, sum hon var áðrenn koronu.
Fyrra hálvár í 2019 ferðaðust 186.099 fólk um flogvøllin í Vágum. Fyrra hálvár í ár vóru tey 72.350 – tað vil siga ein lítil triðingur av ferðafólktalinum fyri tveimum árum síðani.
Heldur gongdin í ferðafólkatalinum fram, sum hon hevur gjørt seinastu tíðina, verður 2021 eitt betur ár enn 2020, men tað fer ikki at koma í nánd av 2019.
