##med2##

Fær B68 trý stig eftir avgerð hjá aganevndini og missir B36 trý stig? Tann spurningurin hevur hingið í luftini, síðani B68 kærdi um, at B36 nýtti ólógligan spælara, tá ið B36 4. september vann 3-1 á heimavølli ímóti B68.

Svarinum á henda spurning hevur tað verið bíðað eftir,  og nú hevur aganevndin svarað spurninginum. Svarið er, at aganevndin dømir B36 at tapa 3-0 og B68 at vinna 3-0.

Seinnapartin prátaði Tróndur Arge við formennirnar, Jákup Mørk hjá B36 og Ian D. Jacobsen hjá B68 um úrskurðin.

Jákup Mørk sigur, at tey í B36 hava kært dómin til yvirkærunevndina, tí tey halda, at eitt slíkt brot eigur ikki at føra til, at ein dystur verður taptur.

Ian D. Jacobsen sigur, at tey í B68 halda seg til reglurnar, og hava kært samsvarandi eftir reglununum.

Á ljóðfíluni omanfyri ber til at hoyra formennirnar í B36 og B68 greiða frá.