Hjálparvenjarin og málmanslegendan hjá NSÍ var heilin aftanfyri tað eitt sindur hvøkkandi útskiftingina í 119. minutti við Løkin í Runavík í kvøld, tá Karstin Hansen sum hevði staðið ein góðan dyst fekk ein hvøkk og var tikin av vøllinum, og tann eldri og royndari Tórður Thomsen kom inn fyri at bjarga NSÍ í brotssparkskappingini, og tað var júst tað Tórður gjørdi við at bjarga trimum brotsspørkum hjá HB.

Jens Martin Knudsen greiðir frá, at hann vildi ikki, at Karstin Hansen skuldi vita um hetta undan dystinum, so hann ikki skuldi órógvast av hesum.

Karstin Hansen var í øðini og rýmdi yvir í Løkshøll tá hann var skiftur út, men Jens Martin sigur seg vera vísan í, at Karstin fer at skilja samanhangin nú alt endaði gott fyri NSÍ.

Tróndur Arge fekk eisini orðið á málverjan og liðskiparan hjá HB, Teitur Matras Gestson sum bjargaði tveimum brotsspørkum, men sjálvur var ein av teimum trimum sum brendu fyri HB. Teitur iðrar seg og sigur, at tað er fyrstu ferð hann hevur brent eitt brotsspark móti Tórði Thomsen. Teitur heldur, at HB var betra liðið í dystinum, og við tí dreymabyrjan liðið fekk við einari 2-0 leiðslu tíðliga í dystinum átti tað at hildið heim hjá teimum, men tað gjørdi tað bara ikki. 

Á ljóðfíluni omanfyri ber til at hoyra samrøðurnar Tróndur Arge gjørdi á FM1 við Teit Matras Gestsson og Jens Martin Knudsen. 

HER  ber til at hoyra frásøgnina hjá Tróndi av teimum fýra málunum og brotssparkskappingini í 9-8 (2-2) sigrinum hjá NSÍ við Løkini í Runavík í kvøld. 

HER  ber til at hoyra samrøðuna Tróndur Arge gjørdi við sigursmálsskjúttan í brotssparkskappingini, Sølva Sigvardsen.