Tað er eingin, sum arbeiðir so leingi, sum føroyingar gera. Tað vísir ein uppgerð hjá Hagstovuni. Tað merkir, at tey ungu í Føroyum byrja fyrr at arbeiða enn tey ungu í øðrum londum, og vit eru eldri, tá ið vit fara frá við eftirløn enn nakra aðrastaðni. Í Føroyum eru tað heili 83 prosent av teimum 15 – 74 ára gomlu, sum arbeiða og tað er serstakliga nógv afturímóti hinum londunum í Evropa.
Men uppgerðin hjá Hagstovuni vísir, at longu í aldursbólkinum 15-19 ár, eru tað nógv fleiri ung í Føroyum, sum eru á arbeiðsmarknaðinum enn í øðrum londum. Í Føroyum eru nevniliga 70 prosent av teimum 15-19 ára gomlu á arbeiðsmarknaðinum. Í Íslandi eru 60 prosent av teimum ungu í hesum aldrinum á arbeiðsmarknaðinum, í Danmark er talan um 50 prosent, og í ES sum heild eru í miðal bara 20 prosent av teimum 15-19 ára gomlu á arbeiðsmarkninum.
##med2##
Hagstovan sigur, at hjá teimum eldri er munurin næstan líka stórur. Í aldursbólkinum 65-69 ár, eru Føroyar í eini serstøðu við tað, at 65 prosent av teimum eru framvegis til arbeiðis. Tað sama er hjá teimum 70-7 ára gomlu, tí í Føroyum eru 30 prosent av teimum framvegis til arbeiðis, men í øðrum londum eru tað bara 5-15 prosent av teimum, sum eru til arbeiðis.
##med3##
Føroysku kvinnurnar í serstøðu
Hagstovan sigur eisini, at serliga føroysku kvinnurnar eru í eini serstøðu aftur ímóti kvinnunum í øðrum londum. Uppgerðin vísir, at í aldursbólkunum frá 25 ár til langt upp í fimmtiárini, er lítil munur á, hvussu nógvir menn í Føroyum eru til arbeiðis, og hvussu nógvir menn eru til arbeiðis í øðrum londum. Men tað er serliga hjá teimum ungu, og hjá teimum eldru, at munurin er serliga sjónskur, tí tá eru nógv fleiri menn í Føroyum til arbeiðis enn í øðrum londum.
Men kvinnurnar í Føroyum skilja seg heilt burturúr, tí har eru nógv fleiri kvinnur í Føroyum til arbeiðis í næstan øllum aldursbólkum enn tað eru nakra aðrastaðni. Tað er bara í aldrinum 25-29 ár, at íslendsku konufólkini eru lutfalsliga eitt sindur fleiri til arbeiðis, sigur Hagstovan.