Hósdagin var Tróndur í Gøtu í Fáðskrúðsfirði í Íslandi við 700 tonsum av lodnu, sum teir løgdu upp til Loðnuvinnsluna staðnum.
Veðrið var ikki til vildar at sigla til Føroyar at landa á hesum sinni og tí varð henda lastin løgd upp í Íslandi.
Finnur Fríði hevur í vikuni landað 700 tons av lodnu til Varðan Pelagic á Tvøroyri. Teir løgdu eisini eina last upp í Íslandi seinasta sunnudag.
Seinnapartin í hesi vikuni vóru flestu lodnuskip roynt tætt norður úr Høfn í Íslandi, og leggjast kann aftrat, at Norðborg seinasta vikuskifti landaði heilfrysta lodnu á Reyðafirði í Íslandi.
Fagraberg fiskar eisini í íslendskum sjógvi, og teir á Jupiter hava riggað til at fara til Íslands á lodnuveiði.
Tað er Varðin í Gøtu, sum er kelda til hesi lodnutíðindi.
