Teir vaktu stóran ans í Havnargøtum mánamorgunin, teir 9 gomlu Fordarnir, ið koma við Norrönu.
Ferðalagið var á Sjómannsheiminum til morgunmat, áðrenn tey vitjaðu í Miðlahúsinum, har Ford T fólkini fingu kaffi.
Elsti bilurin í danska ferðalagnum er ein Ford T frá 1914, hinir eru frá 20-unum. Onkrir høvdu einans galesju til tak, meðan teir flestu vóru innilokaðir.
Ferðalagið fór fyrst í Norðoyggjar, har tey búgva á Viðareiði í tríggjar dagar, síðan fara tey til Gjáar, har tey skulu yvirnátta einaferð.
Frá fríggjadegnun 21. mai til hósdagin 26. mai, tá tey fara heim aftur til Danmarkar, búgva tey á Vallarheiminum við Hotel Føroyar í Havn.
Ferðaleiðari á túrinum er einasti føroyski limurin í Dansk Ford T klub, Hans Elmar Poulsen í Vatnsoyrum, ið sjálvur hevur ein Ford T frá 1915.
