Fiskivinna
Árini 2000 og 2001 royndust væl, men bæði 2002, 2003 og 2004 hava roynst minni væl.
- Samlaða fallið í nettosølu frá 2000 til 2004 er stívliga 40%, vísa Rasmussen & Weihe á.
Garnaskipini høvdu í 2004 eitt lakari úrslit enn árið fyri.
- Sambært hagtølum hjá Føroya Fiskimannafelag fyri teir fyrstu níggju mánaðirnar í ár, er miðalprísurin hjá garnaskipum lækkaður 10% samanborið við somu tíð í fjør. Haraftrat kemur, at samlaða veiðinøgdin er minkað við 16%. Her skal tó havast í huga, at tølini fyri 2005 fevna um veiðina hjá 6 skipum í mun til 7 skip í 2004.
Rasmussen & Weihe staðfesta tí, at samlaða veiðivirðið tískil er umleið 10% betur fyrstu níggju mánaðirnar í 2005 í mun til somu tíð í fjør.
- Vit vænta, at garnaskipini fara at hava eina ávísa framgongd í rakstrinum í 2005 í mun til árið fyri, heldur felagið.
Samanumtikið kann sigast, at garnaskipini høvdu besta árið í 2000, men síðan hevur gingið aftur á.
- Ársúrslitið er minkað frá 2000 at rokna, og er við árslok 2004 vent frá avlopi til hall.
Sambært greiningini hjá Rasmussen &
Weihe hevur ognaravkastið hjá garnaskipum verið á einum lágum støði í 2002 og 2003 og er vorðið negativt í 2004. Sama er við renting av eginogn.
- Gjaldførið er nøkulunda gott, tó at tað er minkað síðan 2001. Soliditeturin er støðugt øktur fram til 2002, men fall í 2003 og 2004, hóast hann enn er góður, sigur felagið.
Miðalaldurin hjá garnaskipum er 37 ár.
