Flestu partrolarapør eru til fiskiskap, og skipini koma inn at landa, sum henda vikan gongur. Skipini fiska upsa og fáa nakað av hjáveiði.
- Men, fiskiskapurin hjá partrolarunum kundi verið betri, siga tey á Fiskamarknaði Føroya.
Bert ein djúpvatnstrolari er til fiskiskap í løtuni. Ein annar, sum eisini plagar at hanga í, liggur við bryggju.
Í løtuni eru fýra av teimum smærru trolbátunum til fiskiskap. Tríggir fiska á landleiðini, og ein fiskar uttanfyri.
- Trolbátarnir á landleiðini fáa mest av toski og flatfiski - og tann, sum fiskar uttan fyri, fær mest av toski, hýsu og so nakað av flatfiski.
Eitt garnaskip fiskar svartkalva. Teir koma inn at landa síðst í hesi vikuni, men fiskiskapurin er smáligur.
- Tvey garnaskip fiska havtasku. Skipini hava brúkiligan fiskiskap og koma inn at landa miðskeiðis í vikuni, verður lagt aftrat.