Í morgun sást nógv "skúm" oman á sjónum út fyri grótkastinum í Havn og longur úti í Nólsoyarfirði.
Tórshavnar havn sigur, at hetta er eitt fyribrigdi, sum ikki er ókent, men hvør orsøkin til fyribrigdið í veruleikanum er, vita tey ikki við vissu.
- Streymurin hevur verið harður, og vit hava havt eitt lítið lot høgt. Nú er streymurin linkaður aftur, og í morgun var sýnið út eftir sjónum gott.
Hjá Tórshavnar havn halda tey, at slíkt ofta hendir eftir, at trýst hevur verið í sjónum, og óhugsandi er ikki, at hetta er skúm, sum er rikið inn í fjørðin.
- Hetta hevur so einki við olju ella aðra dálking at gera, vóru tey sannførd um, tá in.fo fregnaðist um fyribrigdið í morgun.
Á onkrari útlendskari heimasíðu kann lesast um, at havið eisini kann virka sum ein "uppvaskimaskina".
- Hugsandi er, at talan er um plantuplankton, sum framleiða nógv slím. Slímið verður til "skúm", tá tað verður pískað upp.
Ein onnur versión, sum kann lesast um á netinum, er, at slíkt fyribrigdi ofta er deyðar algur, sum enda uppi í vatnskorpuni og líkjast skúmi.
- Hetta er eitt náttúrufyribrigdi, sum ofta kann líkjast dálking, men dálking er tað ikki, verður sagt.
