Leygardagin var fyrsta føroyska fitness kapping hildin í Norðurlandahúsinum. 11 menn og kvinnur luttóku í kappingini um heitið: »Føroya flottasti kroppur«.
Fitnesskappingar hava í fleiri ár verið í Danmark, og eru tær sera væl umtóktar har. Nú hevur fitness kapping verið fyri fyrstu ferð her í Føroyum, og áhugin tikist at vera stórur.
Væl varð møtt upp til kappingina, og undirtøkan millum áskoðararnar var sera góð. Hørð kapping var millum luttakararnar, og spenningurin hekk í luftini frá byrjan til enda. Hóast harða kapping, skuldu tveir vinnarar verða kosnir, og varð tað Jónina Tegeder, ið gjørdist vinnari hjá kvinnunum, og Robin Jønsson, ið vann hjá monnunum.
Rune Petersen, ið er stigtakari til kappingina, hevur fylgt við í teimum mongu fitness kappingunum, ið hava verið í Danmark. Hann setti sær fyri, at byrja kappingina í Føroyum eisini.
Sambært Rune Petersen, hevur gingist væl við fyrireiking, og hevur undirtøkan verið sera góð, hóast hetta er fyrstu ferð kappingin er.
– Eg varð óvfarin og glaður at síggja so nógv fólk. At áskoðararnir vóru so væl við, gjørdi tað avgjørt ikki verri. Hetta verður uttan iva endurtikið, sigur ein væl nøgdur Rune Petersen.
