Gloymdi ta størstu sparingina av øllum

Tað er ikki dýrari at búgva í Klaksvík enn í Havnini.

Jógvan Skorheim, borgarstjóri í Klaksvík, vísir tí aftur, sum Eyðstein Poulsen, býráðslimur førdi fram fyrr í vikuni  um at Klaksvíkar Kommuna er ikki kappingarfør.

- Eyðstein Ó. Poulsen, býráðslimur gloymir at upplýsa, hvussu nógv bíligari tað er at búseta seg her í Klaksvíkar kommunu enn í Tórshavnar kommunu, sigur Jógvan Skorheim.

Hann er enntá so bráður at koma út við onkrum ringum tíðindum um sína kommunu, at hann gloymir týðandi upplýsingar, við tí úrsliti, at hann kemur við ófullfíggjaðum saman­beringum við Tórshavnar kommunu, sigur Jógvan Skorheim.

- Mær rennur í huga orðatakið, at ringur fuglur drítur í egið reiður, sigur Borgarstjórin.
Hann sigur, at Eyðstein Poulsen gloymir eina ómetaliga týðandi upplýsing, sum ger, at hann fer púra skeivur í sínum tølum.

Jógvan Skorheim vísir til upplýsingar sum siga, at eini hús, sum eru bygd í sjeyti og  áttatiárunum, eru einar 750.000 krónur bíligari í Klaksvík enn í Havn”.

- Miðal rentan til sethús er 3,4% í løtuni og miðal afturgjaldstíðin er eini 25 ár.

- Við hesari fígging kostar eitt bankalán á 750.000 krónur einar 3.700 krónur um mánaðin ella 44.400 krónur um árið.
- Sjálvsagt er hetta nakað, sum ein býráðslimur í Klaksvík, ið fer at samanbera við høvuðsstaðin, eigur og skal taka við í sítt roknistykki , uttan so at hann veruliga ætlar at skaða sína egnu kommunu, sigur Jógvan Skorheim.

Les meiri um sjónarmiðini hjá Jógvani Skorheim, við at  trýsta HER