Grátandi Pique takkaði fyri seg

FC Barcelona vann í gjár 2-0 á Almeria í sponsku landskappingini. Dysturin fekk ein serligan týdning fyri FC Barcelona, tá Gerard Pique kunngjørdi at hetta var hansara seinasti dystur fyri felagið á heimavølli. Tað er enn ógreitt, um hann spælir komandi dyst eisini, sum er á útivølli.

- Tá tú blívur vaksin lærir tú, at tað at elska er eisini at lata nakað fara. Hetta er ikki eitt farvæl. Eg bleiv føddur her, og eg komi at doyggja her, segði Gerard Pique, meðan tárini trillaðu eftir dystin.

FC Barcelona var leikliga greitt omaná frammanfyri yvir 92 túsund áskoðarum, sum vóru komnir at siga verjulegenduni farvæl. Robert Lewandowski misnýtti brotsspark tíðliga í dystinum, men tað fekk ikki týdning, tí Ousmane Dembélé og Frenkie de Jong tryggjaðu FC Barcelona sigurin.

35 ára gamli miðverjin hevur verið umstríddur í seinastuni, tí hann og konan, kenda kolumbianska songkvinnan Shakira, eru farin hvør til sítt, eftir at hann hevði skikkað sær minni pent.

Dysturin móti Almeria var tann seinasti hjá Gerard Pique á Camp Nou. Lokali miðverjin hevur spælt 615 dystir og skorað 53 mál fyri FC Barcelona. Hann er heimsmeistari við Spania, Champions League vinnari og áttafaldur spanskur meistari við FC Barcelona.

Hann hevur ikki spælt nógv í ár og fleiri meta longu, at hann er ein boð upp á ein komandi forseta í felagnum.