Guvernørurin í Texas, Greg Abbott, hevur fingið staðfest covid-19. Tað boðar skrivstovan hjá honum frá í tíðindaskrivi í dag.
- Greg Abbott er liðugt koppsettur móti covid-19. Hann hevur góða heilsu og hevur í løtuni eingi sjúkueyðkenni. Øll, sum hann hevur verið í samband við, hava fingið fráboðan um støðuna.
Guvernørurin varð staðfestur positivur, eftir at hann legði út á netið eina mynd av sær sjálvum - uttan masku. Hann var tá á fundi við aðrar politikarar, teir flestu uttan masku.
Hin 64 ára gamli guvernørurin hevur verið ímóti strongum koronu-tiltøkum, og hann hevur ikki verið fyri at brúka masku í almennum bygningum í statinum.
Tað vakti ans, tá hann í mars avtók so at siga allar koronu-avmarkingar, og tað vóru tey, sum tá hildu, at hetta fór at koma statinum aftur um brekkur.
