Í vikuni hevur Norröna verið jólatúr í Newcastle við túsund ferðafólkum, og eitt tað seinasta, sum var á skránni á túrinum, varð seinnapartin í gjár skipað fyri einum lítlum jólatræshaldi fyri børnum umborð.
Har var eingin annar enn Greytasleikur møttur upp í fullum búna, og glaðu børnini sluppu at dansa um jólatræið við honum, umframt at eitt sindur av sangi og góðum tónleiki frá ROX sjálvandi eisini var á skránni.
Millum annað var talan um eina re-union millum Greytasleik og Rannvá Vesturklett, sum í síni tíð saman við Arinu Bischoff sang sangin Koyr okkurt í mína hosu, ið síðani hevur verið jólamanssangur burturav.
Hesin sangur var í jólaløtuni í Sjónvarpi Føroya í síni tíð, og í 1987 kom hann út á kasettubandinum, Í jólahýri, so nú Greytasleikur og Rannvá sungu hann aftur umborð á Norrönu, vóru júst 25 ár liðin síðani útgávuna.
