Gunnar Vatnhamar og liðfelagarnir í Víkingi Reykjavík komu í kvøld aftur á sigursslóðina í ovara endaspælinum í bestu íslendsku fótbóltsdeildini.
Víkingur vann 2-1 á FH á heimavølli, men leingi stóð á gomlum nøglum.
FH kom á odda tá ein hálvur tími var farin, og teir vóru á sigurskós líka til 80 minuttir vóru leiktir. Tá javnaði Aron Elís Þrándarson til 1-1 og tríggjar minuttir seinni skoraði Nikolaj Hansen sigursmálið fyri Víking.
Sigurin hjá Víkingi fekk stóran týdning fyri Klæmint A. Olsen og liðfelagarnar í Breiðablik, ið taptu 2-4 fyri Vali á útivølli. Klæmint fekk bara seinasta korterið á vøllinum í kvøld.
Sigurin hjá Víkingi merkir, at Breiðablik framvegis liggur væl fyri at blíva nummar trý ella fýra, og harvið sleppa at spæla í undankappingini til Europa Conference League komandi summar.
Um Breiðablik í tí næstseinasta dystinum vinnur móti KR á útivølli komandi sunnudag er evropeiska plássið tryggjað.
Støðan:
| Nr | Lið | Dystir | V | J | T | Málmunur | Stig |
| 1 | Víkingur Reykjavík | 25 | 20 | 3 | 2 | 70:26 | 63 |
| 2 | Valur | 25 | 16 | 4 | 5 | 61:29 | 52 |
| 3 | Breiðablik | 25 | 12 | 5 | 8 | 49:43 | 41 |
| 4 | Stjarnan | 25 | 12 | 4 | 9 | 50:28 | 40 |
| 5 | FH | 25 | 11 | 4 | 10 | 45:49 | 37 |
| 6 | KR | 25 | 9 | 7 | 9 | 33:42 | 34 |
