Longu í kvøld, tað er fríggjakvøldið, tekur HB heima í Gundadali ímóti Víkingi. Hesin dysturin byrjar kl.18.
HB hevur fyribils vent gongdini við tveimum sigrum á rað. Eftir trygga 4-1-heimasigurin ímóti TB bleiv tað til ein tepran 2-1-útisigur ímóti B68 síðsta vikuskifti. Hetta vóru bæði lið, sum liggja undir HB á stigatalvuni, so dysturin ímóti Víkingi verður á tann hátt ein próvtøka.
Vinnur HB dystin, so hava teir av álvara aftur limað seg inn í oddastríðið og eru í tí føri bara tvey stig aftanfyri Víking. Hjá Víkingi hevur gongdin verið alt ov óstøðug seinastu umførini, og eftir summarsteðgin gjørdist tað til eittans stig í fyrstu tveimum royndunum. Uppreisn fingu teir tó so dánt síðsta vikuskifti, tá ið teir á heimavølli vunnu tepurt 1-0 ímóti einum skerdum TB-liði.
Hetta vitnar ikki um nakað serliga gott, so sigast kann, at bæði liðini í Gundadali skulu vísa sína sonnu styrki.
Meistararnir ikki ráð at tapa
Eftir eina annars so góða gongd er tað farið at ganga hinvegin hjá TB, sum eftir seks dystir á rað uttan ein sigur nú er dottið niður um niðurflytingarmarkið. Lemjandi ósigrar er tað vorðið til eftir summarsteðgin ímóti bæði Kí og HB, men í Sarpugerði síðsta umfar vóru teir um at fáa stig burturúr, men taptu at enda 0-1. Tá vóru Dimitrije Jankovic, Bojan Timic og Gilli Sørensen ikki við vegna leikbann, men teir eru altso við aftur nú.
B36 er ósigrað eftir summarsteðgin, har teir løgdu út við einum javnleiki í Streymnesi og síðani hava vunnið 5-1 og 2-0 á ávikavist NSÍ og FC Suðuroy. Spurningurin er, um meistararnir ikki hava verið ein sovandi bjørn, sum nú er vaknað. Tó mugu teir vera ein leikbannaðan Jákup á Borg fyri uttan, og hava teir – eftir eina alt ov laka kappingarársbyrjan – neyvan ráð til annað enn trý stig fyri at halda samband við oddan.
Oddaliðið stórfavorittur
Greiðasti favoritturin hetta umfarið er EB/Streymur, sum heima í Streymnesi fær vitjan av vónleysa FC Suðuroy. Vágbingar royna framvegis eftir sínum fyrsta sigri í Effodeildini, men tað verður
neyvan í Streymnesi, at tað skal hepnast. Hetta er sanniliga
toppur ímóti botni. EB/Streymur
er nevniliga nýtt oddaliði,
meðan FC Suðuroy framvegis er aftast.
Seinast hesi bæði liðini hittust í Streymnesi var 15. apríl. Tá vann EB/Streymur dystin 3-0.
Ein kundi útgreiða nógv hagtøl hvussu illa stendur til hjá FC Suðuroy, men lat okkum bara tríva í eitt: teir skora júst eitt mál triðja hvønn dyst!
Botn- og grannauppgerð
Á Svangaskarði verður grannauppgerð ímillum B68 og NSÍ. Bæði liðini eru beinleiðis hótt av niðurflyting.
B68 hevur havt ilt við at fáa spælið og serliga málskjótingina á glið í ár, meðan NSÍ hevur havt góðar løtur inn ímillum, men - hóast góðan styrk í summarsteðginum – nú av álvara hevur haltað. Fyri hálvum øðrum mánaða síðani hittust hesi liðini í Runavík, og tá vann B68 dystin 2-0.
Oftast hava grannuppgerðirnar á Svangaskarði og í Runavík verið tættar og spennandi, og nú bæði liðini stríðast fyri lívinum í deildini, verður instensiteturin væntandi heilt í topp.
KÍ aftur í oddadysti
Heima í Fuglafirði fær ÍF vitjan av KÍ í enn einum oddadysti. KÍ stóð als ikki royndina í einum oddabraki í heimadystinum á Summarfestivalinum ímóti EB/Streymi, har teir taptu 1-3, og tapa teir henda dystin í Fuglafirði, so er myndin í oddanum heilt broytt og kann KÍ dragna nógv í mun til tann oddasess, teir høvdu herfyri.
ÍF hevur ikki tapt í fimm heimadystum á rað, og verður tað neyvan lætt hjá klaksvíkingum at fáa øll trý stigini við sær. Helst fara klaksvíkingar eftir øllum trimum stigunum, men eitt stig er neyvan nøkur vanlukka. Dysturin í oddanum sera tættur og øll stigini hava nógv at siga.
