H71 er komið víðari í fjórðingsfinaluna í EHF Europa Cup-kappingini, sum fyrsta føroyska lið nakrantíð. Tær eru tí á veg til Ukraina, har tær skulu spæla ímóti HC Galychanka Lviv sunnudagin.
Tað hevur verið ivasamt, um tað fór at bera til at spæla dystin, tí vandi er fyri kríggi. Russland hevur stór herlið sínu megin markið, og tí er vandi stórur fyri kríggi.
Men evropiska hondbóltssambandið, EFH, hevur hildið uppá, at dysturin skal spælast, og at trygt er at spæla. Men nú dregur saman um, tí fleiri lond, teirra millum USA og Danmark, heita nú á sínar ríkisborgarar um at fara úr landinum sum skjótast.
Og tað kann ávirka dystin hjá H71 kvinnunum. Sum kunnugt eru í kvøld komin boð frá danska uttanríkisráðnum, har heitt verður á allar danskar ríkisborgarar um at fara úr Ukraina.
Hallur Danielsen, sum er ein av leiðarunum, sum eru við H71 liðnum á ferðini sigur, at tey fara bara til Ukraina, um tað er forsvarlig.
Men hann vísir á, at tað er nevndin í H71, sum eigur avgerðina, um tey skulu fara ella ikki.
Anna Dam er forkvinna í H71:
– Vit hava vent okkum til EHF (altjóða hondbóltssambandið, red.) og greitt frá, at tilmælini frá danska uttanríkisráðnum eru herd og spurt, um EHF enn halda fast um, at vit skulu spæla í LVIV. Ferðalagið er í Póllandi og skal eftir ætlan ferðast víðari í morgin, og vit frætta frá teimum áðrenn ætlaðu ferðina víðari, sigur Anna Dam, sum er forkvinna í H71.
Tí er enn ógreitt, um H71 kvinnurnar fara til Ukraina í morgin klokkan 11:30, og um dysturin í heila tikið verður spældur.
