Tróndur Arge
21 ára gamli landsliðsleikarin, Hallur Thorsteinsson, sum er ein av teimum royndu í føroyskum borðtennis og í ár vann silvur í FM-kappingini, gleðir seg nógv til at luttaka í HM á triðja sinni.
– Tað er nakað heilt serligt. HM er tað størsta ein kann vera við til sum borðtennisleikari, og tað merkir tú eisini á atmosferini inni í høllini. Allir leikarar eru í toppformi og áskoðararnir gera so sanniliga eisini sítt til, at støðið verður lyft upp. Tað er eisini nakað heilt serligt at sleppa at síggja teir allarbestu á venjingarborðunum bara nakrar fáar metrar frá tær. Ein lærir nógv av at eygleiða teir, sigur Hallur.
Hann hevur saman við restini av landsliðnum fyrireikað seg so væl sum tilber.
– Vit hava fyrireikað okkum stórt sæð alt kappingarárið við miðvísari venjing. Vit hava eisini luttikið í kapping niðri í Danmark fyri at fáa dystarvenjing, sum oftani er trupul at fáa her heima. Í apríl mánaði vóru vit eisini í Rumenia, har vit fingu sera harða venjing og nógvar góðar dystir. Dystarvenjingin er tann, sum er mest umráðandi undan eini slíkari kapping, vísir Hallur á.
Hann er tó lítillátin og vil ikki miðja eftir einari sensatión í HM.
– Vit føroyingarnarir hava onga heimsstyrkislistaplasering, so vit koma at møta tveimum í bólkaspælinum, sum helst eru væl sterkari enn vit. At spæla seg víðari er tí heldur órealistiskt, men vit fara í øllum førum at geva alt vit kunnu, og vónandi fáa eitt gott úrslit og ein sigur kanska, sigur Hallur Thorsteinsson at enda.
[email protected]
