Granskarar á Tjóðsavninum hava staðfest eitt nýtt slag av tøðklukku. Hetta er fyrstu ferð í 105 ár, tí seinast var Trongisvági í 1916, so sigast má, at hetta er nokkso serligt.
Tjóðsavnið greiðir á heimasíðu síni frá, at fimtan tøðklukkur vórðu savnaðar úr seyðatøðum í Koltri í juni mánað 2019.
– Nú hevur Agnes-Katharina Kreiling kannað hesar, og hon kom eftir, at hetta ikki var eitt av teimum trimum sløgunum, sum áður eru skrásett í Føroyum. Hetta vísti seg at vera Aphodius borealis, skrivar Tjóðsavnið.
Sostatt eru fýra sløg av tøðklukkum (Aphodiinae) skrásett í Føroyum.
– Aphodius borealis hevur fingið føroyska navnið norðurtøðklukka, sigur Tjóðsavnið.
Hini sløgini eru roðatøðklukka (Aphodius lapponum), koltøðklukka (Aphodius ater) og svávultøðklukka (Aphodius foetidus). Øll fýra sløgini víggja og vaksa í seyða- og neytatøðum, sambært Tjóðsavninum.
