Ukraina hevur eyðmerkt fýra støð í býnum Kherson, har ukrainar vilja vera við, at russar hava pínt fangar.
Herfyri tóku russar seg aftur úr Kherson, har Russland annars hevur havt valdið síðan tíðliga í krígnum.
Ukrainski ríkisadvokaturin sigur, at hesi fýra støðini eru komin undan kavi, síðan Russland tók seg aftur úr Kherson fyrr í hesum mánaðinum.
- Her fór fram ólóglig frælsisfrátøka, og her vórðu fólk illa pínd, siga ukrainar.
Um dagarnar segði ukrainski mannarættindakommiserurin, Dmytro Lubinets, at funnið er fram til mong spor av píning í Kherson.
Fyri einari viku síðan søgdu ST-granskarar, at hvørki Russland ella Ukraina hava yvirhildið fólkarættarliga forboðið móti píning.
- Krigsfangar á báðum síðum hava verið fyri píning, elektrosjokki og eyðmýkjandi viðgerð, meðan teir sambært granskarunum vóru naknir.
Tað er tíðindastovan NTB, sum ber hesi tíðindi í dag.