Stórur landsliðsdagur er í Føroyum í morgin. Klokkan 13 verður EM-undankappingardystur fyri U21-landslið millum Føroyar og Lettland á ovara vølli í Gundadali. Klokkan 17.30 verður HM-undankappingardystur á Svangaskarði á Toftum millum Føroyar og Litava, sum møtast á áttanda sinni.
Nú ber til hjá fólki at fáa sær ein eyka spenning til báðar dystirnar. Danske Spil, sum er umboðað av P/F Ítróttarvedding í Føroyum bjóðar odds uppá báðar dystirnar.
Sigast má, at almenna danska veddingarfyritøkan hevur størri tiltrúgv til føroyska U-21 landsliðið, enn til føroyska A-landsliðið.
Danskespil bjóðar peningin 5,5 ferðir aftur, um føroyska U21-landsliðið vinnur á Lettlandi. Teir bjóða pengarnir 1,45 aftur, um Lettland vinnur, meðan oddsini uppá javnleik eru 3,6.
Sigur til føroyska A-landsliðið yvir Litava gevur pengarnar heilar 9 ferðir aftur. Meðan oddsini uppá litavaskan sigur eru bert 1,22. Oddsini uppá javnleik á Svangaskarði eru 4,6.
Er onkur djarvur og setir pening uppá, at bæði tey føroysku landsliðini vinna í morgin, so eru oddsini fyri tí heili 49,5.
Oddsini uppá javnleik í báðum dystum er 16,56. Meðan oddsini uppá útisigrar til bæði baltalondini bert er 1,76.
So eingin ivi er um, at Lettland U21 og serliga Litava eru favorittar í morgin.
Rás2 sigur frá báðum dystunum, og hevur upptakt til dystirnar, bæði millum 9 og 12, og millum 15 og 17.
