Tað var ikki tann stóri spenningurin í tí seinasta umfarinum í FM-kappingini, nú Havnar Klubbi stóð seg so væl í teimum seinastu umførunum móti ávikavist Klaksvíkar Billardferlag og Kagganum 1. Leygardagin vitjaði meistaraliðið hjá Havnar Klubba í Kagganum og skjótt stóð greitt, at "klubbamenn" stevndu beint móti gullinum. Tá avtornaði høvdu teir vunnið allar dystirnar uttan tann eina. 16-2 var eitt uppiborið úrslit. Henrik Pedersen var sum so oftani besti spælarin við einum meðan uppá umleið 27 eygu. Síðani komu Carsten Hansen og Niels Nielsen. Á liðnum hjá Kagganum 2 vóru Heimir Ottoson, Anfinn Hansen og Johannes Skaarup.
Í Klaksvík megnaði Kaggin 1 eitt vinna við 10-8. Bestur var Bjarni Skaalum, sum vann tveir av trimum dystum og hevði omanfyri 25 eygu í meðal. Í hølunum á honum var Krisjan Sune Høgensen við fýra stigum og uleið 24 eygum í meðal. Á triðja plássinumv ar Jan Müller við 4 stigum og 21 eygum í meðal. Hinir spælararnir vórðu Njál Petersen, Sonhard Johannesen og Steinbjørn í Dali. Njál, sum ikki hevur verið í stødinum í kappingini, tók tó dyk á seg móti endanum og vann tveir dystir.
Tað eru eini 12 ár síðani, at Havnar Klubbi var FM í billard. Tá vóru Eirikur Nielsen, Eli Zachariassen og Steingrím Samuelsen í velmaktini. Mest vinnandi liðið síðani tá hevur verið Klaksvíkar Billardfelag, sum hesuferð endaði á 3. plássinum. Ein orsøk man vera tann, at Ólavur Kjølbro ikki hevur verið við í ár. Hann er burturi í lestrarørindum.
Endaliga støðan gjørdist henda: Nr. 1 Havnar Klubbi við 74 stigum, nr. 2 Kaggin 1 við 62 stigum, nr. 3 Klaksvíkar Billardfelag við 56 stigum og Kaggin 2 aftastur við 26 stigum.
FM kappingin fyri staklingar verður í ár spæld í Klaksvík. Innleiðandi umfarið verður í Havn 11. og 12. Mars og finaluumfarið í Klaskvík 18. og 19. Mars. Freistin at tekna seg er nú fríggjadagin.
