Havsbrún í Fuglafirði sleppur nú at seta tríggjar milliónir krónur í Hanstholm Fiskemelsfabrik.
Hetta gav aðalfundurin í danska felagnum loyvi til í vikuni.
Partapeningurin í felagnum er í løtuni seks milliónir krónur, men hann verður hækkaður upp í 9 milliónir, og tær tríggjar milliónirnar hevur Havsbrún rætt til at seta í felagið.
Harvið kemur føroyska felagið at eiga ein triðing í tí danska felagnum.
Stórt hall
Hanstholm Fiskemelsfabrik er tann minsta av sínum slagi í Danmark. Í roknskaparárinum 1999/2000 tók virkið ímóti 108.462 tonsum av ídnaðarfiski.
1999/2000 var eitt vánaligt ár hjá felagnum, tí tað hevði hall upp á 1,1 millión krónur. Virkið fekk statsstuðul til orkunýtslu upp á næstan hálvafjórðu millión, og tí var hallið áðrenn óvanligar inntøkur 4,5 milliónir krónur.
Hetta kallaði nevndin eisini eitt »ikki nóg gott úrslit« á nevndarfundinum í vikuni.
Venda gongdini
Havsbrún og Hanstholm Fiskemelsfabrik hava havt ávíst samstarv seinasta árið, og Havsbrún hevur víst áhuga fyri at koma upp í danska felagið.
? Nevndin heldur, at samstarvið við Havsbrún fer at styrkja málið um, at tað altíð skal verða eitt fiskamjølsvirki í Hanstholm, segði Henning Bjerregaard, nevndarformaður, á aðalfundinum.
Virkið í Hanstholm vónar, at samstarvið við Havsbrún kann tryggja rávøru og vinning í framtíðini.
