Fyri fjórðu ferð á rað er HB í góðveðrinum á Skála farið av vøllinum uttan at hava vunnið fulla úrtøku.
Úrslitið var 1-1, og nú er HB trý stig frá triðja plássinum og B36, sum hevur væl betri málmun enn HB.
Úrslitið boðar frá, at tað er kreppa í HB. Stóri trupulleikin er, at tað ikki eydnast at skora mál, og at tað ov sjáldan eydnast at vinna stórar málmøguleikar úr greiðu yvirvágini í spæli.
Dan í Soylu var í dag saman við Heðini Hansen sentralur miðvallari, og Dan megnaði at fáa glið á samanspælið á miðvøllinum, og HB spælararnir vóru ágangandi og pressaðu heimamenninar frammarlaga.
Hóast stóru yvirvágina eydnaðist tað ikki HB at finna málið í fyrra hálvleiki. Eisini tí Jákup Nolsøe Olsen var óførur í heimamálinum.
Dan í Soylu var maðurin, sum umsetti HB yvirvágina til 1-0 leiðslu, tá ið seinni hálvleikur var ein tíma gamal. Adrian Justinussen legði fram úr vinstru, við handara stólpa stútaði Heri H. Mohr inn fyri málið, har Dan í Soylu stýrdi bóltin í málið.
HB helt fram við at eiga yvirvág, men skálamenn vístu betri hugburð, enn teir gjørdu í fyrra hálvleiki. Vukasin Tomic gekk undan í miðverjuni, har hann og Jákup Jakobsen vóru ógvuliga raskir. Skála vann ikki nógvar møguleikar, men tá HB leiðslan var so tepur, so lúrdi møguleikin fyri, at tað kundi eydnast at skjóta mál og vinna eitt stig, og soleiðis varð tað.
12 minuttir restaðu, tá ið innskifti Martin Johansen eftir horna fekk høvi einaferð aftrat at leggja innfyri úr høgru, og við handara stólpa var tað Pætur Dam Jacobsen, sum við høvdinum stýrdi bóltin í málið heilt dygst niðri í nærra málhorninum.
HB royndi at svara aftur, og skálamenn sparkaðu høgt og langt og stríddust fyri stiginum, og tað eydnaðist, eisini tí Jákup N. Olsen í evstu løtu bjargaði heilt væl.
Nýggi álopsspælarin hjá Skála Jamiu Ola Ajibade varð skiftur inn í seinna hálvleiki, og hann órógvaði mótstøðumenninar við sínum skjótleika.
Hetta var fimta ferðin, at Skála vann eitt stig, og javnleikurin í dag ber við sær, at Skála lyfti seg uppum B68.
Skála – HB 1-1 (0-0)
0-1: Dan í Soylu
1-1: Pætur Dam Jacobsen
Dómari: Rúni Olsen
Skála: Jákup N. Olsen – Teitur R. Joensen, Vukasin Tomic, Jákup Jakobsen, Djóni Petersen – Pætur Dam Jacobsen, Karl Martin Johansen – Poul Kallsberg, Steinbjørn Olsen, Emil Weihe Joensen – Jan Ingason Hansen
HB: Teitur Matras Gestsson – Heri Hjalt Mohr, Bartal Wardum, Hørður H. Askham, Ári Mohr Jónsson – Dan í Soylu, Heðin Hansen – Áki D. Samuelsen, Stefan Radosavljevic, Adrian Justinussen – Jákup L. Thomsen
