Tá ið vanliga leiktíðin var farin í Gundadali fríggjakvøldið sá tað út til, at talan skuldi verða um endurtøku frá steypadystinum fyri viku síðan, tá ið HB vann 3-2 á B36. Talvan vísti 1-0 til HB, sum legði seg framum í 1. hálvleiki. Christian R. Mouritsen var undir málinum, tá ið hann stýrdi fløtum innleggi úr vinstru frá Heina Vatnsdal í málið. Arkitekturin var enn eina ferð Andrew av Fløtum.
So var tað í eykatíðini, at Jákup á Borg eftir horna av brotsteigarmarkinum við innaru síðuni sendi bóltin upp í málhornið. 1-1 og tað sást, at HB kendi seg at hava mist tvey stig, og at teir í B36 kendu seg at hava vunnið eitt stig.
– Hetta var fantastiskt. Eg fylgdi bóltinum allan vegin, og tað var framúr kensla at síggja netið vera spílað út. Tað var nátúrligt, at vit runnu yvir til áskoðararnar. Avrikið í 2. hálvleiki var alt annað enn gott, men viðhaldsfjøldin bar okkum til síðstu løtuna at leggja tað eyka í, sum skuldi til, var viðmerkingin hjá ovurfegna Jákupi á Borg.
Andrias Eriksen var nýggjur miðverji?
– Hann spældi fantastiska væl, og hann hevur arbeitt við eyðmýkt. Seinastu ferðirnar hevur hann verið bestu maður á 2. liði, og eg haldi eisini, at tað er herðaklapp til okkum venjarar, at vit nú vístu honum álit, og at hann tók av, sóu øll tey, sum fríggjakvøldið vóru í Gundadali.
