Sermitsiaq veit at siga, at heilsumiðstøðin í grønlendska býnum, Maniitsoq, er stongd, tí eitt starvsfólk á støðini hevur fingið staðfest covid-19.
Samstundis er fráboðað, at fólk, sum hava tørv á bráðfeingishjálp, kunnu ringja eitt ávíst telefonnummar.
Enn er ikki greitt, hvør smittukeldan er.
Korunu-myndugleikarnir í Grønlandi siga, at tá starvsfólkið, sum nú er vorðið smittað, hevur havt fleiri nærsambond á sínum arbeiðsplássi, hevur hildið verið rættast at lata Heilsumiðstøðina aftur.
Starvsfólkini á støðini eru nú kannað, og tá svarið fyriliggur, verður støða tikin til, nær heilsumiðstøðin skal lata uppaftur.
- Koronu-smitta hevur ikki áður verið staðfest í Maniitsoq, veit Sermitsiaq at siga í dag.
Eini keðilig tíðindi úr Grønlandi í dag eru, at heili 17 nýggir koronu-tilburðir eru staðfestir í Nuuk seinasta samdøgur. Av hesum eru 12 børn, tey flestu á dagstovninum, Timmiaaqqat, sum tískil framvegis er stongdur.
##med2##