Í løtuni eru fýra partrolarapør til fiskiskap, og flestu pør fiska upsa.
Skipini fáa eisini nakað av hvítum fiski, serliga blálongu, longu og hýsu.
- Partrolararnir hava heldur frægari fiskiskap í løtuni, vita tey á Fiskamarknaði Føroya at siga. Lagt verður aftrat, at trý partrolarapør liggja við bryggju.
Ein djúpvatnstrolari er á svartkalvaveiði, og teir koma møguliga inn at landa síðst í næstu viku.
- Allir teir smáu trolbátarnir liggja við bryggju. Ivasamt er, nær teir loysa, tí veðurforsøgnin er ikki góð.
Á Fiskamarknaði Føroya siga tey, at tvey garnaskip fiska svartkalva og tvey fiska havtasku. Fiskiskapurin er misjavnur.
- Øll garnaskipini koma inn at landa í næstu viku, verður lagt aftrat.