Bæði Helgi Dam Ziska og Høgni Egilstoft Nielsen fingu javnt á ovaru borðunum móti sterkastu telvarunum hjá Argentina.
Á niðaru borðunum noyddust okkara menn til endans at leggja kongin. Leingi var líkt til, at John Rødgaard eisini fór at fáa sítt talv javnt, men í endatalvinum misti hann tráðin.
Minni spenningur var um talvið á fjórða borði, har 16 ára gamli, Luitjen Akselsson Apol, kýtti seg til fánýtis móti sterkum stórmeistara.
Dysturin millum Føroyar og Argentina endaði tí 3-1 til Argentina, sum er styrkismett nummar tretivu í kappingini.
Góða gongdin hjá Helga Dam Ziska stendur við. Hann hevur nú fimm stig í sjey dystum á 1. borði.
Í dag var serliga hugaligt at síggja, at føroyameistarin, Høgni Egilstoft Nielsen, á 2. borði var mentur at halda tørn við svarta fólkinum móti stórmeistara, ið hevði út við hálvtannaðhundrað ratingstig fleiri.
Eftir dystin í dag eru Føroyar nummar 96 av teimum 188 liðunum í kappingini.
Áttanda umfar er í morgin, og seinni í kvøld fæst at vita hvørjum Føroyar telva ímóti. Ellivu umfør eru í alt. Olympiadan endar týsdagin.
