Tað verður Jóhan Petur Poulsen, sum kemur at standa á odda fyri besta liðnum hjá Víkingi í framtíðini. Felagið hevur fyrr í dag koyrt Eyðun Klakstein frá. Orsøkin er, at ferð skal setast á ættarliðsskiftið, skrivar felagið. Síðani meistaraheitini í 2016 og 2017 hevur tað ginngið illa at finna stevið í Sarpugerði. Maurice Ross, Sigfríður Clementsen, Sámal Erik Hentze og nú Eyðun Klakstein hava allir verið venjarar, men ongin hevur sitið leingi. Víkingur skrivar í tíðindaskrivinum, at felagið ikki ger fleiri viðmerkingar til málið. Hetta er ikki ókent fyri Víkingi, tá teir hava koyrt ein venjara. Tað verður skrivað í tíðindaskrivinum, at "Leiðslan í felagnum ynskir nú, at tað skal meira ferð á hesa tilgongd, har ungir leikarar fáa størri leiklut á besta liði felagsins." So er spurningurin hvussu hetta skal skiljast, tá leiðslan hevur verið partur av eini tilgongd, sum hevur heintað fleiri spælarar til útifrá? Víkingur er í løtuni í einari góðari gongd, har liðið hevur vunnið seinastu tríggjar dystirnar, og hevur fýra dystir, sum á pappírinum kunnu vinnast. Tað er eisini landsliðssteðgur, so helst hevur leiðslan í felagnum hugsa hetta inn í avgerðina. Nýggi venjarin, Jóhan Petur Poulsen, er ein virdur venjari í venjaraumhvørvinum. Hann hevur seinnu árini verið venjari hjá 1. deild hjá Víkingi við góðum úrslitum, og eisini verið høvðusungdómsvenjari. Hann hevur ikki royndir frá bestu deildini, men er nokk tann venjarin, ið kennir tilfarið hjá Víkingi best. Víkingur skrivar soleiðis: Seinnu árini hevur eitt ættarliðsskifti verið ávegis í Víkingi. Leiðslan í felagnum ynskir nú, at tað skal meira ferð á hesa tilgongd, har ungir leikarar fáa størri leiklut á besta liði felagsins. Vit hava í dag gjørt avtalu við Jóhan Petur Poulsen, um at gerast høvuðsvenjari hjá Víkingi, og harvið ganga á odda fyri tí tilgongd, sum vit nú fara undir. Hóast ungur og ongar royndir sum venjari í bestu deildini, so er Jóhan Petur eitt vælkent andlit í okkara felagi, har hann í skjótt 6 ár hevur verið venjari hjá okkara fyrstudeildarliði. Haraftrat hevur hann seinastu tíðina eisini virkað sum høvuðsungdómsvenjari í felagnum. Vit ynskja Jóhan Peturi bestu eydnu við høvuðsvenjarastarvinum.        Vit takka Eyðuni Klakstein fyri tíðina og ynskja honum alt tað besta víðari. Víkingur hevur ikki fleiri viðmerkingar til venjaraskiftið.