Landsstýriskvinnan í mentamálum, Rigmor Dam, hevur sett Sonna Óla Djurhuus í starvið sum skúlastjóri í Skúlanum við Streymin, og hann tekur við tann 15. januar.
Tað boðar Mentamálaráðið frá í morgun.
Sonni Óli Djurhuus er 41 ár, tók læraraprógv í 2003 og bachelor í námsfrøðiligari leiðslu, við høvuðsdenti á samstarvi ímillum fakøki, í 2013. Eisini hevur hann UEFA-A prógv sum venjari í fótbólti.
Eftir lokna útbúgving var Sonni Óli Djurhuus lærari í Sankta Frans skúla, men síðani var tvey ár í Danmark, har hann arbeiddi í einum serskúla og vanligum skúla. Hann kom heim til Føroya í 2006 og byrjaði í Norðskála-Oyrar Skúla, har hann, umframt at vera lærari eitt tíðarskeið, eisini var fyrstilærari í tvey ár. Somuleiðis hevur hann undirvíst í Skúlanum við Ósánna eitt tíðarskeið.
Hetta síðsta hálvttriðja árið hevur hann verið leiðari á Rásini í Runavík, ið er ein samdøgurstovnur og skúli fyri ung við menningartarni.
Hann hevur verið virkin í ítrótti í mong ár og hevur eisini verið landsliðsvenjari hjá ÍSB í 13 ár, sigur Mentamálaráðið.
