Grikkaland og Turkaland eru hart rakt av skógareldum.
Ræðandi myndin oman fyri er tikin í bygdini Limni á oynni Evia týsdagin í hesi vikuni. Bygdin liggur umleið 160 kilometrar norðan fyri grikska høvuðsstaðin, Athen.
Herviligir skógareldar hava higartil kostað 12 fólkum lívi - átta eru deyð í Turkalandi, tvey í Grikkalandi og tvey í Italia. Haraftrat hava fleiri fingið bruna-og roykskaðar, og sløkkiliðsfólk hava eisini verið fyri skaðum.
Grikski ríkisleiðarin, Kyriakos Mitsotakis, sigur, at landið er í einari ógvuliga truplari støðu eftir fleiri dagar við hitabylgju, sum hevur gjørt Grikkaland til eina krúttunnu, sum hann tekur til.
Bæði í Turkalandi og Grikkalandi eru fleiri túsund fólk flutt burtur, tá skógareldur nærkaðust bygdum øki, samstundis sum hitin hevur ligið millum 40 og 45 stig.
Sjálvt í grikska høvuðsstaðnum, Athen, er luftgóðskan ikki til at halda út av royki og øsku frá skógareldum, sum herja yvir býin.
