Síðani Flogbóltssambandið fór undir steypakappingina í 2000, hava tað altíð verið altjóða dómarar, ið hava verið fyrstudómarar í finalunum. Fyrstu árini komu útlendskir dómarar hendavegin at døma, men síðani 2005 hevur Jan Hentze verið fyrstidómari – hvørja ferð við Tummas Óla Mortensen sum øðrumdómara.
Men í ár verður øðrvísi í kvinnufinaluni millum SÍ og Mjølnir, tí tá skal Jan hava kona sína, Rúnu Hentze, sum annandómara. Kvinnur hava ofta verið linjudómarar, og í ár verður eisini Rosa Jacobsen annar av linjudómarunum í kvinnufinaluni, men hetta verður fyrstu ferð nakrantíð, at ein kvinna stendur við netið sum dómari.
– Eg havi dømt nógv í Eik-liguni í vetur, tí eg eri í sokallaða dómarabólkinum. Har havi eg bæði verið fyrsti- og annardómari, og so hvørt sum eg havi fingið fleiri og fleiri royndir, havi eg eisini verið alsamt tryggari í dømingini, sigur Rúna, sum eisini dømdi, tá hon var virkin sum spælari, tí tá máttu spælararnir sjálvir døma dystir hjá hvørjumøðrum.
– Í eini steypafinalu er nógv meira fokus á enn vanligt, og har plagar at vera so nógvur gangur, at eg noyðist helst at rópa harðari, men annars er hetta ein dystur sum allir aðrir. Jan og eg hava dømt nógvar dystir saman í vetur, so tað skal nokk ganga.
Errin av konuni
Hóast Jan Hentze sum altjóða dómari hevur roynt bæði eitt og annað, er hann sjónliga errin av, at kona hansara sleppur at døma aðra steypafinaluna í ár, samstundis sum hann ikki dylur fyri, at hon hevur bæði neyðugar royndir og førleikar.
– Rúna hevur dømt nógv, serliga í vetur, og hon er eisini A-dómari, og hartil hevur hon eisini gjørt tað gott sum dómari. So við og við hevur hon oftari verið fyrstidómari, hóast hon at byrja við helt tað vera eitt sindur løgið, at eg sum altjóða dómari skuldi »bara« vera annardómari, sigur Jan, ið sær tað sum ein fyrimun fyri dømingina, at tey eru maður og kona.
– Vit kenna jú hvønnannan út og inn, og heima tosa vit nógv um døming. Eg haldi hetta vera bæði spennandi og stuttligt, og eg vóni, at hetta kann geva øðrum kvinnum hug at bjóða seg fram sum dómarar. Tá tú gevst at spæla, er dómaragerningurin eitt upplagt høvi til framvegis at vera ein virkin partur av spælinum.
Í mansfinaluni millum ÍF og Mjølnir verður Jan Hentze fyrstidómari og Tummas Óli Mortensen annardómari. Linjudómarar verða Sveinur Tróndarson og Óli G. Samuelsen, ið eisini er linjudómari í kvinnufinaluni.
