Kári Johansen, býráðslimur hjá Javnaðarflokkinum í Havn, sum hevur meldað seg úr Javnaðarflokkinum, tí hann fór »heim aftur í Framsókn«, sum hann sjálvur málbar seg, er ikki longur á listanum hjá Framsókn.

Tað váttar Ruth Vang, forkvinna í Framsókn.

Hon sigur, at Kári Johansen hevur tikið seg av listanum hjá Framsókn ein av seinastu døgunum.

– Eftir at hava hugsað meg um í eina tíð, skal eg hervið boða frá, at eg havi tikið avgerð um at stilla upp á listanum hjá Framsókn til komandi kommunuval, segði Kári Johansen í fráboðan 8. august.

Trupulleikin hjá Kára Johansen var, sambært honum sjálvum, at »hosurnar í Javnarflokkinum vóru ov trongar hjá sær at vera í«.

- Harafturímóti passa míni politisku áhugamál væl í Framsókn, segði Kári Johansen, sum eisini kendi seg vælkomnan í Framsókn, har hann saman við øðrum valevnum var í ferð at gera valskránna lidna.

Men soleiðis skuldi tað kortini ikki vera. Kári Johansen er nú eftir øllum at døma eisini fyrrverandi limur í Framsókn – í øllum førum hevur hann tikið seg av listanum.

Spurningurin er so, hvar Kári Johansen stillar upp – ella um hann gevst í politikki.

Hann hevði ikki stundir at tosa við in.fo, tá vit ringdu til hansara.

Men eftir stendur í øllum førum, at fýra býráðslimir hjá Javnaðarflokkinum ikki eru á nøkrum lista, sum er kunngjørdur, og heldur ikki eru á listanum hjá Framsókn.

Spurningurin er so, um onkur teirra eru farin heimaftur í Javnaðarflokkin, ella um vit fáa ein nýggjan borgaralista, sum hevur nóg víðar hosur til avhopparar úr Javnaðarflokkinum.