Tað hevur havt ávirkan, at lógin er broytt soleiðis, at hybrid bilar nú sleppa bíligari í avgjøldum til landskassan.
Tað staðfestir Sámal av Reyni, stjóri hjá Toyota umboðnum í Føroyum, Reyni Service.
– Jú, fólk hyggja meira eftir hybrid bilum nú, enn tey gjørdu áður, sigur Sámal av Reyni.
Hjá Reyni Service hava tey nógvar hybrid bilar, tí Toyota hevur alla tíðina verið sera frammalaga á hybridøkinum.
Tað eru 18 ár síðani, at Reyni Service seldi fyrsta hybridbilin, sum varð seldur í Føroyum, ið var ein Toyota Prius. Síðani tá eru seldir umleið 600 Toyotabilar við hybridtøkni. Toyota er frammalaga við hybrid-tøkni, og flestu modellini fáast sum hybrid.
– Men prísurin hevur verið stóra avbjóðingin. Hybridbilarnir vóru munandi dýrari enn somu bilar við bensin ella diesel, og tað var ein trupulleiki, sigur Sámal av Reyni, stjóri á Reyni Service, sum er fegin um ta broyting, sum Løgtingið gjørdi fyrr í ár, tá avgjøldini vórðu lækkað á hybrid bilum í sambandi við, at lógin um el-bilarnar varð broytt.
##med2##
Elbilurin er á gáttini
Í næstsíðstu viku kunnugjørdi Toyota, at tey koma við einum nýggjum modelli av einum el-bili, sum eitur BZ – Beyond Zero.
– Tað er nakað, sum vit eru sera spent uppá, sigur Sámal á Reyni.
– Vit vætna at fáa tvey elbilamodell í 2022. Nú koma so tvey model sum plugin hybrid. Toyota Rav 4 og Toyota Prius.Og tá kanst tú koyra upp til 75 km upp á el, so koyrir tú bara í Havnini, so kanst tú klára teg við bara at koyra upp á el.
Øll Toyotamodellini – uttan tann lítli og frammanundan økonomiski Aygo, fáast sum hybrid.
Eftirspurningurin eftir diesel minkar støðugt, eins og eftirspurningurin eftir bensinbilum eisini minkar nakað – tí størsti eftirspuringurin er eftir hybrid.
– Vit fáa í næstum ein nýggjan el vørubil, Pro Ace, ið kemur sum elbilur bæði við 50 KW og 75 KW battaríi. Teir verða helst vælegnaðir til býarkoyring, heldur Sámal av Reyni.
Vetnisbilar frá Toyota
Toyota er eisini sera frammalaga við brint tøkni við Toyota Mirai.
Har er eitt nýtt model av brintbilinum hjá Toyota, Mirai. Hann er vorðin enn flottari og prísstøðið farið nakað niður.
Enn ber ikki til at fylla brennievni á í Føroyum. Tað skulu serligir kompressarar til. Tað verður helst ein uppgáva fyri oljufeløgini.
Men eins og við elbilunum, so er einki avgjald á brintbilar eins og teir eisini fáa mvg-afturbering. Men í Føroyum vantar infrakervið til brintbilar.
– So tað liggur nakað frammi í tíðini, men valla nógv ár, nøkur fá ár, kanska eini 3-4 vildi eg mett, sigur Sámal av Reyni.
Fyrimunurin við brint er, at tað tekur bara eina lítla løtu at fylla tangan, eins og við brennievni, og tað kann goymast í tangum sum bensin og diesel.
Brintbilarnir, ella vetnisbilar, sum tað eitur á føroyskum, eru meira økonomiskir at koyra við enn bensinbilar, og so eru teir eisini sum hybrid bilar – við brint og el.
Heldur betri brúktbilavirði
Spurdur hvussu lógarbroytingin av avgjaldinum á hybridbilarnar hevur merkt prísstøðið svarar Sámal av Reyni:
– Enn eru hybrid bilar dýrari enn bensin og diesel, men ikki so nógv. Nú er tað skjótari at spara pengarnar innaftur í spardum brennievni og lægri vektgjaldi, umframt at hybridbilurin eisini verður lættari at selja aftur um nøkur ár, enn ein bensin ella diesel. Eg hugsi, at teir fara halda betri virði, sigur hann.
Hjá Reyni Service hava tey nógvar hybridbilar á goymslu. Yaris, sum júst er blivin ársins bilur í Evropa er nógv eftirspurdur, so tað eru ikki so nógvir av honum eftir á goymslu, sigur hann.
Spurdur hvussu nógv bíligari, bilarnir eru vorðnir síðani lógarbroytingina í februar, sigur Sámal av Reyni, at lækkingin liggur millum 30.000 og 140.000 krónur frá tí bíligasta til tann dýrasta hybridbilin.