Melduródnin Batsirai hevur kravt í minsta lagi tíggju mannalív á Madagaskar.
Tað upplýsa myndugleikarnir í landinum.
Harða melduródnin rakti eysturstrondina av Madagaskar leygarkvøldið og hevur elvt til stórar oyðileggingar.
Í minsta lagi 48.000 fólk eru flutt burtur úr sínum heimum, og materiellu oyðileggingarnar kring um í bygdum og býum eru stórar, eitt nú í Manakara og Nosy Varika.
Vegir liggja undir í vatni, trø eru koppað, og streymurin er burtur nógvastaðni.
Stórir partar av Madagaskar hava frá tropisku ódnini, Ana, staðið undir í vatni.
Ana, sum herjaði landið í síðsta mánaði, kravdi í minsta lagi 58 mannalív, veit tíðindastovan NTB at siga.
Madagaskar er lýðveldi í Indiska Havinum, sum liggur einar 400 kilometrar úr afrikansku landsynningsstrondini.
Við sínum 590.000 ferkilometrum er høvuðsoyggin, sum eisini kallast Madagaskar, fjórð størsta oygg í heiminum.
Í 2020 var fólkatalið á Madagaskar 27,69 miljónir. Høvuðsstaðurin er Antananarivo.
##med2##
