ÍBV vann føroyingauppgerðina og fjúrtanda dystin á rað

Føroyingauppgerð var í bestu íslendsku hondbóltsdeildini hjá kvinnum í kvøld.

Á Hafnarfirði tóku Natasja Hammer og liðfelagarnir í Haukum móti Ingibjørg Olsen og hennara liðfeløgum í ÍBV.

ÍBV vann ein greiðan 30-23 sigur. Haukar vóru væl við í fyrra hálvleiki, og í steðginum var ÍBV bert á odda 15-14. 

Talan var um fjúrtanda sigurin á rað hjá ÍBV, ið nú er fremst í deildini við 32 stigum.

Natasja skoraði fýra mál fyri Haukar, ið enn ikki hevur tryggjað sær pláss í endaspælinum.

Seks tey fremstu liðini aftaná lokið grundspæl vinna seg í endaspælið.