Ísraelski herurin fór í nátt inn í norðara part av Libanon.
IDF sigur, at talan í fyrsta lagi er um eina málrættaða og avmarkaða innrás móti Hizbollah-málum har suðuri í Libanon - hinu megin markið til Ísraels.
Sambært Reuters er harðir bardagar við Hizbollah-deildir í økinum.
- Vit fara eftir málum í bygdum nærindis markinum, sum eru ein hóttan móti okkara fólki í norðara parti av Ísrael, sigur ísraelski herurin í nátt.
Sagt verður, at ísraelska krígskabinettið hevur góðkent innrásina, sum er løgd til rættis seinastu mánaðirnar.
Tíðliga síðstu nátt framdi ísraelski herurin álop á forstaðir til Beirut, og tíðindastovan Al Jazeera sigur, at fleiri bygningar eru lagdir í oyði.
Sambært Al Jazeera heitti Ísrael á íbúgvarnar í økinum um at rýma, áðrenn álopini byrjaðu.
Á X, fyrrverandi Twitter, sigur ísraelski herurin, at álopini eru vend móti vápnaframleiðslu og hernaðarliga undirstøðukervinum hjá Hizbollah, sum herurin sigur krógvar seg millum fólkið í tætt bygdu økjunum.
Ísrael sigur, at herurin brúkar neyvleikavápn í bardaganum móti Hizbollah í norðara parti av Libanon.
Í morgun hevur amerikanski verjumálaráðharrin, Lloyd Austin, lagt út á X, at hann hevur umrøtt gongdina í stríðnum við ísraelska verjumálaráðharran, Yoav Gallant.
- Eg gjørdi honum greitt, at USA stuðlar rættinum hjá Ísrael at verja seg, sigur amerikanski verjumálaráðharrin.
