Tað var hin 7. oktober, at Hamas leyp á Ísrael við óteljandi rakettum.
Hamas-fólk bardu seg eisini inn um ísraelska markið, har tey gjørdu feigdina um seg, drupu frá hond og tóku fleiri enn 200 gíslar.
Í Ísrael hevur verið sagt, at umleið 1400 fólk lótu lív í eirindaleysa Hamas-álopinum, og hetta vóru fólk úr fleiri ymiskum londum.
Flestu teirra, sum vórðu dripin í álopinum, vóru sivilfólk, men eisini nøkur hundað ísraelsk herfólk og løgreglufólk lógu eftirá.
Í dag hevur ísraelska uttanríkisráðið sambært tíðindastovuni AFP dagført talið av deyðum úr 1400 og niður í 1200.
- Hetta er tað dagførda talið, sigur talsfólk fyri ísraelska uttanríkisráðið.
Sagt verður, at eftir yvirgangsálopið vóru fleiri lík, sum í fyrstu atløgu ikki vórðu eyðmerkt.
- Nú halda vit, at fleiri av hesum vóru yvirgangsfólk, sum lótu lív - og ikki ísraelar, sigur talsfólkið, sum kallast Lior Haiat.
Flestu, sum vórðu dripin í Hamas-álopinum, vóru sivilfólk.
Men, ísraelsku myndugleikarnir hava áður sagt, at millum tey deyðu vóru eisini 380 ísraelsk herfólk og løgreglufólk.
