Fótbóltur Í Víkingi gjørdu tey skjótt av, tá Jógvan Martin Olsen fyri trimum vikum síðani boðaði frá, at hann nú gavst sum føroyskur landsliðsvenjari. Anton Skoradal hevði givið nevndini boð um, at hann ikki ynskti at halda fram sum høvuðsvenjari hjá Víkingi, og nevndin í felagnum setti seg alt fyri eitt í samband við nú fyrrverandi landsliðsvenjaran. Samráðingarnar gingu bæði skjótt og væl, og seinnapartin fríggjadagin kundi Víkingur so bjóða til tíðindafund, har tað fyri væl møttu fjøldini, sum mundi telja eini 80 fólk, varð staðfest, at Jógvan Martin Olsen er nýggjur høvuðsvenjari hjá felagnum. Súni og Sámal Brandur Jacobsen, sum er limur í bólkinum kring Formula-hópin hjá Víkingi, fegnaðist sum vera man um tvey-ára sáttmálan, sum nú er gjørdur. Hartil staðfesti hann, at spælarahópurin til komandi kappingarár nú longu er um at vera komin upp á pláss. Allur hópurin, sum hevur spælt í ár, er til reiðar at taka eitt tørn afturat, og hartil verður talan møguliga um onkran einstakan spælara afturat, varð sagt. Hvørjir spælarar kunnu koma upp á tal, varð ikki staðfest, men í øllum førum mundu tveir av gestunum í fyrrverandi LÍF-húsinum vekja forvitni. Súni Olsen skal finna sær nýtt felag at spæla fyri, eftir at hann varð mest sum grýttur úr B36, og tað er á ongan hátt óhugsandi, at talan aftur verður um fótbólt í Sarpugerði hjá honum. Og millum gestirnar var eisini Sámal Joensen. Hann hevur siglt við farmaskipi seinasta árið, men tað ljóðar, at hann møguliga hevur hug at koma á land aftur. Og fær hann aftur fast undir føturnar, er neyvan nakar ivi um loyalitetskenslu hansara, tá eitt felag skal veljast.