Tað hevur ikki gingið nakað serligt hjá Andrei Shevchenko, síðani hann skifti til enska stórfelagið Chelsea at spæla. Málini hava verið fá og atfinningarnar nógvar.
Mánakvøldið var tó krút í gaggunum hjá Shevchenko, sum skoraði ein drønmál ímóti Tottenham í fjórðingsfinaluni í FA Cup. Shevchenko sveiggjaði vinstra beini nakað úti frá, og bólturin streyk upp í málhorni.
Hetta er annar dystur á rað, at Schevchenko skorar fyri Chelsea. Leygardagin skoraði hann í dystinum móti Sheffield United, so hann tykist veruliga at vera komin í gongd.
Leygardagin verður Schevchenko við á ukrainska landsliðnum, sum kemur á Svangaskarð at spæla EM-dyst ímóti Føroyum. Tá er bara at vóna, at Jákup Mikkelsen klárar at verja fyri kanónskotunum hjá Shevchenko.
