Janus Rein stórtrívist síðani hann er komin upp í Fólkaflokkinum fyri sløkum tveimum mánaðum síðani.
Tað staðfesti hann á landsfundinum hjá Fólkaflokkinum leygardagin.
Janus Rein varð valdur á Løgting fyri Framsókn, men viðurskiftini ímillum hann og floksformannin, Poul Michelsen, kólnaðu. Endin var, at Janus Rein fór úr Framsókn og fyrst í september meldaði hann seg upp í Fólkaflokkin
Og hann sigur, at Fólkaflokkurin hevur tikið móti honum við opnum ørmum.
Í eini røðu, sum fyrst og fremst var ein takkarrøða, segðu hann, at hann var øgiliga takksamur og øgiliga rørdur yvir móttøkuna, hann hevði fingið í Fólkaflokkinum.
Hann sigur, at hann hevur fingið eina ótrúliga góða møttøku, bæði frá Floksformanninum, landsstýrisfólkum, tingfólkum og baklandinum hjá flokkinum annars.
Hann takkaði eisini teimum í Fólkaflokkinum, sum høvdu slóða fyri, at hann fann heim aftur, sum hann málbar seg.
