Jóanis Erik er nýggjur kommunustjóri

Fuglafjarðar býráð hevur sett Jóanis Erik Køtlum í starv sum kommunustjóri í Fuglafjaðar kommunu

Fuglafjarðar kommuna boðar í kvøld frá, at býráðið hevur sett nýggjan kommunustjóra. Hetta hevur býráðið gjørt á býráðsfundi í kvøld.

 

Tað er Jóanis Erik Køtlum, sum nú verður kommunustjóri í Fuglafirði.

 

Jóanis Erik Køtlum er 56 ára gamal og útbúgvin búskaparfrøðingur. Hann hevur drúgvar leiðsluroyndir frá ymiskum størvum í Føroyska og Grønlendska heilsuverkinum. Jóanis Erik Køtlum hevur m.a. verið sjúkrahússtjóri og heilsuverksstjóri.

 

Jóanis Erik Køtlum byrjar í starvinum sum kommunustjóri tann 1. juni 2022, verður sagt á heimasíðuni hjá Fuglafjarðar kommunu.

 

Tá ið kommunan lýsti eftir kommunustjóra, varð sagt soleiðis um starvið og tann, sum kommunan ætlaði at seta í starvið:

 

Vilt tú hava stóra ávirkan?

 

Vilt tú vera við til at gera strategiskar ætlanir sum røkka inn í framtíðina?

 

Fuglafjarðar kommuna leitar eftir einum visionerum kommunustjóra, ið megnar at finna javnvágina í eini kommunu har súlurnar eru vitan, vinna og mentan.

 

Fuglafjarðar kommuna hevur ein greiðan og vælskipaðan byg-nað við væl skikkaðum starvsfólkum. Starvið sum kommunustjóri setur serstøk krøv til leiðslueginleikar og persónsmensku, tí uppgávurnar spenna frá ítøkiligum, kommunalum avbjóðingum til strategiskar ætlanir, ið røkka inn í framtíðina.

 

Fyri rætta umsøkjaran er talan um heilt sjáldsama góðar møguleikar at geva íkast til menningina av Fuglafjarðar kommunu, heilt frá barnaansing og mentamálum til veitingar og karmar til nakrar av landsins størstu fyritøkum.

 

Nærri lýsing av starvinum, førleikakrøvum, setanartilgongd o.a. síggjast í stjóraprofilinum.

 

Løn og setan

Miðað verður eftir at starvið kann verða sett frá 1. juni 2022, ella skjótast tilber eftir hetta. Starvið verður lønt í 37. lønarflokki hjá Tænastumannafelag Landsins, tó uttan at verða eitt tænastumannastarv. Harumframt verða 15% goldin í eftirlønargjaldi. Stjórasáttmáli verður gjørdur, og møguleiki er fyri áramálssetan.