Amerikanska poppstjørnan, Justin Timberlake, hevur mist koyrikortið.
Tað hevur ein dómari í rættinum í Sag Harbor avgjørt í sambandi við rættarfund í gjár.
Tað skriva fjølmiðlarnir Sky News og Fox News.
Tað er ikki greitt, hvussu leingi hann missir koyrikortið.
Sag Harbor er ein býur í amerikanska statinum New York.
Náttina til 18. juni í ár varð Justin Timberlake steðgaður av løgregluni í Sag Harbor, eftir at hann hevði koyrt yvir reytt ljós í sínum gráa BMW.
Hann hevði eftir øllum at døma trupult við at halda seg innan fyri koyribreytina.
43 ára gamla poppstjørnan varð síðani handtikin fyri rúsdrekkakoyring.
Í ákæruritinum lýsa l´greglufólkini, sum vóru á staðnum eyguni hjá Justin Timberlake sum "blóðsprongt og glaskend", andadrátturin luktaði illa av rúsdrekka, og hann var óstúttur á fótum.
Hann varð fluttur á eina løgreglustøð, har hann noktaði at anda inn í ein alkomátara.
Sangarin, sum síðani er leyslatin, hevur sjálvur pástaðið, at hann bert hevði drukkið ein martini, áðrenn hann setti seg í bilin.
Justin Timberlake luttók virtuelt á rættarfundinum úr belgiska býnum Antwerpen, skrivar Sky News.
Har skal hann at framføra 3. og 4. august í sambandi við ferðina, "The Forget Tomorrow World Tour".
Sambært Fox News hevur Justin Timberlake undir rættarfundinum noktað seg sekan í rúsdrekkakoyring. Poppstjørnan, sum fer til Danmarkar á konsert í Royal Arena í Keypmannahavn 29. og 30. august, er fyrrverandi limur í dreingjabólkinum 'N Sync og er kendur fyri síni løg "Cry Me a River" og "SexyBack".
/ritzau/
