– Er tað í lagi at hesin kynsvillingurin ger innslag um HIV?
Soleiðis spyr Beinir Joensen í Runavík á Facebook í kvøld, eftir at hann hevur sæð innslag um HIV í Degi og Viku, har John Johannessen var vertur. Innslagið var gjørt í sambandi við, at altjóða AIDS dagur er í dag.
– HIV kemur upprunaliga av kynsvillu og hevur síðani smittað onnur, skrivar Beinir Joensen og heldur fram:
– Í løtuni eru apukoppar aktuellir og smitta eisini við livihátti, sum hesin sjónvarpsverturin hevur og prædikar fyri.
– KVF stinkar, leggur hann so afturat.
John Johannesen heldur lítið um slíkar homofobiskar útsagnir:
– Hetta er enn eitt prógv um, at homofobi livir sítt seiglívaða lív her í Føroyum.
– Vit mugu mótmæla og vísa á, at slíkar útsagnir ikki eru í lagi, so tað ikki gongur út yvir okkara ungu menniskju, sum enn ikki hava torað at staðið við sín samleika.
– Eg var sjálvur ein, so her veit eg, hvat eg tosi um, sigur John Johannessen í stuttari viðmerking.
